लम्की / कैलालीको लम्कीचुहा नगरपालिका–३, बल्चौरमा रहेको जीवादिप आधारभूत विद्यालयमा शैक्षिक सत्र २०८३ को प्रथम त्रैमासिक परीक्षाको नतिजा प्रकाशन कार्यक्रम सम्पन्न भएको छ।

विद्यालयले कक्षा ६ देखि ८ सम्म सञ्चालन गरेको प्रथम त्रैमासिक परीक्षाको नतिजा सार्वजनिक गरेको हो। त्यस्तै, कक्षा १ देखि ५ सम्मका विद्यार्थीहरूको मूल्याङ्कन भने निरन्तर मूल्याङ्कन प्रणालीका आधारमा गरिएको विद्यालयले जनाएको छ।

निरन्तर मूल्याङ्कनअन्तर्गत विद्यार्थीको नियमित उपस्थिति, कक्षाकार्य, गृहकार्य, सिकाइमा सहभागिता, व्यवहार, सिर्जनशीलता तथा समग्र सिकाइ उपलब्धिलाई आधार बनाइएको छ। यसले विद्यार्थीको परीक्षा केन्द्रित मूल्याङ्कनभन्दा पनि नियमित सिकाइ प्रक्रिया र व्यवहारिक पक्षलाई समेट्ने विद्यालयको भनाइ छ।नतिजा प्रकाशनसँगै विद्यार्थीहरूको शैक्षिक उपलब्धिको समीक्षा गर्दै आगामी दिनमा सिकाइलाई थप प्रभावकारी बनाउने विषयमा समेत छलफल गरिएको थियो। विद्यार्थीको कमजोर पक्ष पहिचान गरी सुधारका लागि आवश्यक सहयोग गर्ने तथा राम्रो प्रदर्शन गर्ने विद्यार्थीलाई थप प्रोत्साहन गर्ने नीति विद्यालयले लिएको छ।

विद्यालयका प्रधानाध्यापक दिनेश चौधरीले मूल्याङ्कनलाई विद्यार्थीको सिकाइ अवस्था पहिचान गर्ने माध्यमका रूपमा लिँदै कक्षा १ देखि ५ सम्म निरन्तर मूल्याङ्कन र कक्षा ६ देखि ८ सम्म परीक्षामार्फत विद्यार्थीको सिकाइ उपलब्धि मापन गरिएको बताउनुभयो। उहाँले विद्यार्थीको शैक्षिक गुणस्तर सुधारका लागि विद्यालय, शिक्षक, विद्यार्थी र अभिभावकबीच निरन्तर सहकार्य आवश्यक रहेकोमा जोड दिनुभयो।

कार्यक्रमले विद्यार्थीको शैक्षिक अवस्थाको जानकारी गराउनुका साथै आगामी सिकाइलाई थप व्यवस्थित, प्रभावकारी र विद्यार्थीमैत्री बनाउने आधार तयार गरेको विद्यालयले जनाएको छ।